IDLES (SIWEL) — Aṭṭas n yimedyazen, imyura, d yicennayen i yerran tajmilt i Dda Lwennas. Yal yiwen s wacu. Mas Lhasen Uzyan, nessen-it d argaz asertan, maca d amedyaz diγen. Yuzen-aγ-id yiwen n usefru i yura kra n wussan kan seld timenγiwt n Lwennas. Atan ihi d agi …
Ar tmurt rzu fell-as
Deg At ɛisi ḥekker εeṭṭel
Anda akken yeγli Lwennas
Tawrirt Musa tuklal
Ad tesɛeddiḍ din yiwen was
Sellem γef igenni d wakal
Meɛtub zzi-d i lḥara-s
Ma tewwḍeḍ ini-d awal
Ttxil-k sebber yemma-s
Awi tamgut n leḥbeq
Err-as-t γef uẓekka-s
In’as mmi deg uzal ireq
Ay aḥbib-ik yeča rsas
Deg damen-ik a d-yemγi lḥeq
S wuglan neγ s tuγmas
Ihi a k-hedduγ asefru
Hdu-t i yizem aγilas
In’as tamurt akk tettru
Tedjiḍ-d ilem d lweswas
Neggul am ass-a ad tt-nefru
D wid i γ-yefkan maras
Teccebḥeḍ-d timeγriwin
Terniḍ lmelḥ i lfuruḥ
Mara cennunt tehdayin
Yyamt tiγratin ad nruγ
Kker m’ ad truḍ ay aḥnin
Dacu ara isebren rruḥ
D bab n nnif d ahwawi
Anef i w’ibγan ad yegzem
Tecniḍ-aγ-d Lḥesnawi
Lɛenqa Sliman Azem
I tizya-k terniḍ iswi
Yiwen ur izmir a k-yezzem
Fella-k iqqers-d wedrar
Ass-ayi inhed-ed yuγwas
Ifrawes uğadermi lɛar
Tadukli trennu tissas
Tamurt-ayi a s-neg leqrar
D lawan ad tbeddel lsas
Lḥasen Uzyan,
Yunyu 98
SIWEL 2520h00 jan 17