AT ƩISI (SIWEL) — Teqqed tasa n uqbayli, aṭas iyaγ yettwanγan n yergazen d lxalat, i irefden anay n umennuγ d timuγnest, deg kra n yijeṛiḍen ad ɛerḍeγ ad heḍreγ γef yiwen n umeγnas aneγmas, i yettwanγan deffir tecḍaṭ n rebrab, wayyi d Muḥ Ʃacur Belγezli. Ddut-d yid-nneγ ad tesɛum xerṣum tikti d anwat urgaz-a.

Muḥ Ʃacur Belγezli d yiwen seg xilla n yirgazen i d-fkan yidurar n Ğerğer, ilul deg useggas n 1956, d mmi-s n Ugemmun n At Ʃisi, d ameγnas n Teqbaylit d yizerfan n umdan. Yella gar 24 n yimeḥbas deg tefsut n 1980. Iɛedda deg creɛ sebba n timmuγnest-ines. D aneγmas deg uγmis “Le Pays-Tamurt” yettaru imagraden s snat n tutlayin Tafransist akk d Teqbaylit.

Yella daγen d aɛeggal deg tidukla i yettḥaraben γef warrac ur nesɛi imawlan. Testeqsa-d γer γures maccaren yettawin ur tettcuḥu deg as n 17 deg ayyur n furar deg useggas n 1996, yeğğa-d deffires sin yigerdan deg akud-nni, deg tudert-is 40 n yiseggasen, deg tzeqqa n uxeddim-is umi sawalen « Universalcom ».

Imṭṭurfa, isniselmen, yečan tacriḥt n tsekkurt ur seqnaɛen ara, imi ur tenγan ara iman-is kan, rnan nγan yides tilemẓit n 25 d aseggas deg ixef-is tagi d uletmat-nneγ Dalila Dridec seg temnaḍt n Mirabu, i yellan d tameγnast Taqbaylit d yizerfan n umdan d tlelli n tγamsa, yerna d tanelmadt.

Γef waya Amazday n yilemẓiyen n Ugemmun gran-d tiγri i yimezdaγ n wat Ʃisi, ad tren tajmilt i umeγnas aneγmas Dda Muḥ Ʃacur Belγezli, azekka d lğemɛa, anda ara d yili usras n tmeqqunt n yijeğigen deg usebdad n umeγras-nneγ deg iγrem n Tizi Wezzu γef 9.30h, ad sersen tameqqunt niḍen γef uẓekka-s deg tjebbantn Ugemmun γef 10.30h, sin akkin ad ɛeddin γer usrusu n uẓru amezwaru i lebni n uxxam n yilemẓiyen umi ara d fken isem n Muḥ Ʃacur Belγezli.

 

Akli Muhubi
Siwel 161935 FEV 17