TIZLIT (SIWEL) — Aṭas i d-yufraren n trebuyaɛ d yigrawen n cna n Teqbaylit deg yiseggasen n 70 d 80, gar-asen Imaziγen Imula, Agraw, Ifguren, Atmaten, Imunan, Idurar, Igman, d waṭas-niḍen. Agrakal d yiwen seg-sen.
Agrakal d yiwen n ugraw n cna s Teqbaylit, i d-yufraren deg yiseggasen-nni n 80, asmi tebda tnekra, d usuγu γef tnekkit. Iɛeggalen-is seg temnaḍt n Melbu, tawilayt n Bgayet, deg tmurt n Yiqbayliyen.
D tarbaɛt i yecnan deg aṭas n tamiwin d tudrin, deg useggas n 1988, iɛeggalen n ugraw Agrakal, skelsen yiwet n tesfift, maca ur d tfiγ ara, acku kra n wakud kan, yella-d ccwal deg taluft-nni n tuber.
Deg ayyur n meγres yezrin Sɛidi Deḥman ameslal n terbaɛt Agrakal, iyekr-d s tebγest, d leḥmala yefka i uẓawan, ysekles aḍebsi amenzu, deg-s ṭam n tezlatin i yecna s Teqbaylit, s uγanib n lfulklur. Yesefra γef tayri, d tudert n yal ass, aḍebsi-ya yeffeγ-d γer teẓrigin cine kabyle production n mass Murad Bucafa n tizi wezzu.
Deg tezlit tis kraḍ, acennay Sɛidi Deḥman, yesmekta-d u yerra tajmilt i unaẓur amenzu n ugezdu n ssaḥel, i yerẓan asalu i tezlit taqbaylit n temnaḍt-a, wagi d Ʃezdin Berquq, i yemmuten ass-nni n 26 yebrir, γef tudert n 60 n yiseggasen.
Taneggarut n lḥal, tiγri ad tili i Yiqbayliyen d Teqbayliyin, ad fken afus n tallelt i wid d tid iqedcen seg ul, ilmendad n tnekkit d yidles aqbayli. Deg tallit n wass-a Taqbaylit tesra i tarwa-s ara t-yebnun, s tira, cna, amezgun d tsertit d wayen-niḍen ma yella wamek. Afus deg ufus, γef Teqbaylit ur nekkat afus.
Akli Muhubi
SIWEL 272003 Apr 17 UTC
