TAFASKA (SIWEL) — Ggten-t tdukliwin tidelsanin deg tmurt n Yiqbayliyen id yessuddusen yal aseggas tifaskiwin n tmedyazt, deg iswi n usnerni n twesit-a. Gar tdukliwin-a tella tin n yusef uqasi d si muḥend u mḥend deg tizi wezzu, itri adelsan n uqbu, adrar n fad deg ayt smaɛel, lbacir amellaḥ deg ferɛun, smaɛil Azikiw deg at ziki, d tiyaḍ yal yiwet s yisem-is.
Tidukla tadelsant Smaɛil Azikiw, tegra-d tiγri i yimedyazen, d timedyazin, ad kkin deg tfaska n tmedyazt deg teẓrigt-is tis ukuẓ. Ara d-yilin deg ussan n 10, 11, 12 deg ayyur n γuct, anebdu n 2017, deg taddart tawrirt n war, taγiwant n at ziki, deg ugezdu n tizi wezzu.
Γas akken aheggi n tfaska-ya mači d win i sehlen, deg yiwet xuṣṣen ttawilat ama d tadrimt neγ d ayen-niḍen, deg tayeḍ teγli-d deg unebdu, anda imdanen rewlen γer yilel. Maca iɛeggalen n tidukla n Smaɛil Azikiw ur brin ara i ṭbel deg aman, s tebγest d tayri fkan i tnekkit, begsen am yiwen ad awḍen iswi. Anebdu mači i zzhu kan, d leqdic daγen γef tutlayt d yidles.
Ihi wid d tid iran ad kkin(t), yewwi-d fell-awen(t), ad taznem(t) kraḍ n yisefra d imaynunten, yettwarun tlatinit, s ttawil n uselkim, yerna ur sɛun ara uṭṭunen neγ kra n tira d zyada γef usefru. Imekki ilaq ad yesɛu 18 iseggasen d asawen. Isefra ad twaceyɛen s yiwet n talγa d word neγ pdf. Isefra yewwid ad twaceyɛen gar 10 yunyu γer 10 yulyu γer tansa-ya : [email protected]. I wugar n yisalen tzemrem ad tsawlem γer: 06.99.64.81.76 neγ 06.65.82.34.62 neγ asebter n fb
Tanemmirt i kra n tidukla iqedcen i uḥraz n tutlayt d yidles n teqbaylit, id yeddan d igiman n yiseggasen. Ilaq tagmat d tdukli, afus deg ufus alma yuli yiswi. afud igerrzen.
Akli Muhubi
SIWEL 230640 Jun 17 UTC