TASEKLA (SIWEL) — Mačči d yiwen neγ sin n Yiqvayliyen i d-yufraren deg yiseggasen-nni n 1970, tnaḍaḥen γef tjaddit d yizerfan, yal yiwen akken i d-yewwi amennuγ-is. γas akken tugdi tezdeγ ilsawen, tasertit n udavu tseγli-d lweḥc deg uzal qayli, maca mugren aya s tezdeg, gar-asen yella Muḥend Ceɛvan.

Ceɛvan Muḥend ilul deg yiseggasen n 1950, d mmi-s n taddart n Teẓrurt, lɛerc n At Wart Uɛli, di Tizi n Berbar. Taẓrurt tella deg tallit n temharsa tafransist d “Taγzut Yettwagedlen-Zone Interdite”.

Yexdem deg uḥric n tujjya, maca aya-gi ur as yelli ara d ugur i wakken ad yeqdec γef tnekkit. Yexdem isefra, yura ticeqqufin n umezgun, ijemɛ-d xilla n wawalen iqvuren, timseɛraq, isefra d yicewwiqen, inzan d wayen-nniḍen.

Yeslul-d tarvaɛt n umezgun yefka-as isem: “Imraɛen”, tekka-d aṭas n tamiwin. Gar tceqqufin i yura tella: amecḥaḥ, amsujji, ulac tavaγurt ugar tajaddit, taγzut yettwagedlen, d tiyaḍ-nniḍen, ur nettwasen ara.

Mas Muḥend yessefraw daγen ama s teqvalit neγ s tefransist. Yettawi-d γef tjaddit, tamurt, ttraḍ, tameṭṭut, yerra tijmilin, yessefra γef temsal-nniḍen, yal ta d tadyant-is.

D ameγnas deg umussu adelsan, yella d aɛeggal deg aṭas n tdukliwin. Rnu γer waya yekki deg xilla n temliliyin, anda yal tikelt yettɛaraḍ ad yefk tamuγli-is s tizeḍt n wawal.

Akli Muhubi
SIWEL 230953 Sep 17 UTC