AWEQAS (SIWEL) – Tadukli n Ayt Ʃisa, akken tuγ tanumi, sya γer da tettawid icennayen, at umezgun, d yimedyazen γer ubraḥ n Buteγwa, deg iswi n tukksa n lxiq d useḥbiber γef tnekkit Taqbaylit d yidles amaziγ s umata. Γef waya ddurt yezrin, Tadukli tnecded tacennayt tameqqrant Malika Dumran.
Areqqas n saɛɛa ad yili γer lewhi n 21h, imi yebda wahil n cna deg umezgun n Buteγwa. D Lɛaziz Cekkal, mmi-s n taddart n Ayt Ʃissa, i yeldin tawwurt s tezlatin-is s wudem unsib. Sin akin tagennit tettunefk i yiwet terbaɛt n yinelmaden i d-yusan si Tizi Wezzu, ssawalen-as Agraw “Freehead” i yesduqsen azayez s cna-nsen atrar. Tendel-itt tnaẓurt taqbaylit n cna tamḥaddit s uγanib atrar Malika Dumran. Tezwar-d s tezlitt « asaru », seg-mi tebda wid tid i d-yusan ad twalin zgan cennun yid-s meẓẓi meqqer, tulawin arrac.
Tekfa tmeγra n cna lewhi n 23h, yerna aṭas n yimeγnasen d imyura i d-yusan seg yal tiγmert n tmurt n Yiqbayliyen ad walin tacennayt-tameγnast, gar-asen adamsan Ḥusin Tulayt, amsenselkam Muḥend Belqasem, amaru-amazṛag Racid Ulebsir, d wiyaḍ yal yiwen s yisem-is.
Asnemmer n tselwayt n Tdukli n Ayt Ʃisa Ğabri Farida:
Tanemmirt i wid d tid i yettekan di tmeγra n cna n Teqbaylit i d-thegga tdukli n At Ʃissa, imi i d-tenced Massa Malika Dumran γer ubraḥ n umezgun n Buteγwa, d terbaɛt n ilemziyen “Freeheda”, rnu Mass Lɛaziz Cekal acennay n taddart n Ayt Ʃissa.
Tanemmirt daγen i Mass Akli Muhubi i d-yefkfan timɛiwna s wazal-is s udlis i d-yura « Timuɛay ». Bla ma shiγ imma Ḥlima i d-isewwen imensi.
Tanemmirt i yiwaziwen d twaziwen i d-ibedden am yiwen, myuṭṭafen afus deg ufus almi d tagara n leqdic, kul yiwen s yisem-is, kul yiwen ad iɛqel iman-is.
SIWEL 122200 Sep 17 UTC
